د.شريف عرفة
طبعا الامتحانات بتعمل قلق والبيت كله بيعلن حالة الطوارئ القصوى.. خصوصا لو كان في البيت واحد في الثانوية العامة..
النهارده هاقول لك أفكار حلوة هتساعدك وإنت بتذاكر.. عشان تعرف أفضل الطرق لتثبيت المعلومات.. خلي بالك إن كاتب السطور جاب 99% في الثانوية العامة.. يعني باتكلم عن نظامنا التعليمي بالتحديد و جربت الحاجات دي قبل قبل كده و جابت نتيجة معايا، و ممكن تلاقي فيها طريقة تجيب نتيجة معاك.
أنواع الذاكرة
عشان نعرف نذاكر لازم نعرف الأول الذاكرة بتاعتنا بتشتغل ازاي.. وعن طريق معرفتنا دي ممكن نستخدمها أفضل استخدام..
الذاكرة أيها السادة نوعان.. ذاكرة قصيرة الأمد، وأخرى طويلة الأمد.
1- الذاكرة قصيرة الأمد..
النوع ده هو اللي متخزن فيه المعلومات العابرة خلال اليوم..
مثلا:
فطرت إيه النهارده؟
عملت إيه امبارح؟
المعلومات دي ممكن تبقى معانا لفترة قصيرة وبعدين تنساها... لو سألتك الأسئلة دي بعد سنتين.. ممكن ماتبقاش فاكر إنت فطرت إيه من سنتين!
الذاكرة قصيرة الأمد بتتخزن بسرعة عن طريق العقل اللاواعي..
و يقال إن الذاكرة قصيرة الأمد دي سعتها 7 زائد أو ناقص معلومتين في المرة الواحدة..
عايز تعرف ازاي؟
تعالى نلعب لعبة...
تمرين:
احفظ الرقم اللي قدامك ده حالا:
123313414515
ماعرفتش تحفظة؟؟
عادي!
الرقم اللي قريناه من شوية ده.. ماعرفناش نحفظه بسهولة عشان زي ما قلت لك.. الذاكرة قصيرة الأمد بتشيل بس 7 معلومات زائد أو ناقص اتنين (من 5 إلى 9 معلومات في المرة).. و الرقم اللي شفناه ده مكون من 12 رقما.. يعني 12 معلومة.. عشان كده صعب على الذاكرة قصيرة الأمد إنها تشيله..
يبقى إيه الحل؟
عشان تحط الرقم ده بسهولة في الذاكرة قصيرة الأمد.. ممكن نلعب لعبة بسيطة.. بدل ما يبقى 12 معلومة.. خليه 4 معلومات بس!
عارف ازاي؟
بص على نفس الرقم لما كتبناه بأسلوب تاني:
123
313
414
515
بقى سهل يتحفظ كده.. صح؟
كل اللي عملناه إننا قسمنا الرقم بشكل تاني.. بحيث نحفظ كل شوية مع بعض (مش رقم رقم زي الأول.. الرقم الطويل خليناه 4 معلومات بس.. فبقى أسهل!
قاعدة مهمة:
عشان تعرف تحفظ.. قسم المعلومات الكبيرة المعقدة لمعلومات أبسط..
واربط بين المعلومات وبعضها عشان تحفظها أسهل
2- الذاكرة طويلة الأمد..
دي الذاكرة اللي بتشيل المعلومات المهمة جدا اللي من الصعب جدا إنها تتنسي..
مثال:
اسمك إيه؟
رقم تليفونك كام؟
وكده يعني..
والذاكرة دي عشان تتكون لازم تقوم بشوية مجهود في الأول.. بعد كده هتثبت بطريقة رائعة..
وهي دي المذاكرة بقى..
يعني إيه مذاكرة؟
المذاكرة دي -في نظامنا التعليمي الأساسي بالتحديد- هي إنك تنقل المعلومات من الذاكرة قصيرة الأمد، للذاكرة طويلة الأمد.. عشان كده لما حد يقول لك: عايزك تحفظ الدرس ده زي اسمك، يبقى كأنه بيقول لك: عايزك تحفظ الدرس ده بالذاكرة طويلة الأمد!
لكن لو ذاكرت درس ونسيته تاني يوم.. تبقى بتستخدم الذاكرة قصيرة الأمد بس.
ازاي ننقل المعلومات للذاكرة طويلة الأمد؟
عشان ننقل المعلومات للذاكرة طويلة الأمد لازم نقوم ببعض المجهود زي ما قلنا..
1-التكرار:
هيخلّي عقلك يتعامل مع المعلومة باهتمام لأنه بيصادفها كتير.. تبقى مهمة بالنسبة لك.. حاول تراجع اللي ذاكرته و تستعيده من ذاكرتك أكثر من مرة.
2-استخدام مراكز المخ المختلفة:
الطريقة دي هاتخلي مخك يشتغل عالمعلومة بأكتر من طريقة..
- إنت بتذاكر بعينك: يعني مراكز الإبصار في المخ اشتغلت على المعلومة دي.. ذاكر من مصدر واحد عشان الذاكرة البصرية تساعدك في استرجاع المعلومة.
- اكتب وإنت بتذاكر: هيخلي مراكز المخ المخصصة بعملية الكتابة تشتغل على المعلومة دي.. فالذاكرة الحركية تشتغل عالمعلومة دي.
- سمّع اللي ذاكرته: نشطت مراكز الذاكرة ومركز الكلام اشتغل برضه على نفس المعلومة لو كنت
بتسمّع بصوت..تخيل نفسك بتشرح المعلومة دي لحد تاني.
بالطريقة دي المعلومة تغلغلت جواك بأكتر من طريقة.
3-الحالة الذهنية:
وإنت بتذاكر المعلومة حط في دماغك إنك بتذاكرها عشان تفضل على طول وتفيدك طول حياتك.. لو ذاكرتها على اعتبار إنها معلومة مؤقتة عايزها للامتحان بس, عقلك هيتعامل معاها على إنها معلومة تافهة ويحطها في الذاكرة قصيرة الأمد زي ما إنت طلبت منه!
تخيل إنك بتحفظ المعلومات دي لأنك هتحتاجها بعد سنين طويلة.. تخيل كده مش هتخسر حاجة..
بتذاكر ليه؟
فيه مقولة حلوة بتقول:
..Its not about how good you are
! Its about how good you want to be
يعني مش مهم إنت تكون كويس.. الأهم إنت عايز تبقى كويس لأي درجة!
إيه علاقة ده بالمذاكرة؟ لازم نعرف إن توقعاتنا هي اللي بتحدد مستقبلنا.. راقب حالتك الذهنية وإنت بتذاكر..
سؤال:
هل بتذاكر عشان تتفوق؟
هل بتذاكر عشان تطلع الأول؟
ولاّ بتذاكر عشان تعدي وخلاص؟؟
لو كنت بتذاكر عشان تعدي وخلاص اعرف إن ده أمر للعقل اللا واعي إن مجهودك الذهني مايزيدش عن مرحلة (أعدي وخلاص).. مجرد توقعك إنك مش شاطر قوي هيخليك تبذل -لا إراديا- مجهود أقل في المذاكرة..
نعمل إيه؟
وإنت بتذاكر حط في دماغك التالي:
"أنا باذاكر عشان أتفوق.. ماحدش أحسن مني في أي حاجة..
أنا باذاكر عشان أطلع الأول على كل اللي أعرفهم..لو ذاكرت بالحالة الذهنية دي.. هتحقق نتائج أكتر بكتير من اللي كنت هتحققها لو كنت بتذاكر عشان (تعدي وخلاص)..وخلي بالك:
((اللي بيذاكر عشان يطلع التاني.. عمره ما هيطلع الأول!!)) عرفت بقى؟
الفكرة دي مش هتكلفك أي حاجة.. وإنت قاعد قدام الكتاب أو المذكرات اللي بتذاكر منها.. حط في دماغك الفكرة دي.. إن إنت بتذاكر ده عشان تتفوق بيه وتطلع الأول..
ملحوظة:
راقب الحالة الذهنية اللي كنت بتذاكر بيها قبل كده وحققت معاك نتيجة . المهم تكون طريقة التفكير دي بتحفزك و تخليك تبذل مجهود أكبر.
أي حاجة بنعملها بيبقى لها دافع معين.. إيه هو الدافع اللي بيخليك تذاكر؟ يعني بتذاكر عشان ترضي والديك؟ بتذاكر وخلاص؟ بتذاكر عشان لازم تذاكر؟ فيه نوعين من الدوافع.. خارجية وداخلية..
الدوافع الخارجية:
هي الدوافع اللي خارجنا ومالناش سيطرة عليها.. يعني مثلا: "لو ذاكرت هاجيب لك كورة!"
الولد ده الدافع بتاعه اللي بيخليه يذاكر هو الكورة..
النوع دع من الدوافع قوي جدا وبيدي نتائج.. لكن عيبه إنه غير مستمر في الزمن.. وبينتهي الإنجاز بانتهاء الدافع الخارجي.. يعني اللي بيذاكر عشان الكورة.. مش هيذاكر بعد ما تجيله الكورة! ومش هيذاكر لو ماكانش فيه هدية للمذاكر!
يبقى النوع ده من الدوافع مش مضمون ومش لازم نخليه دافع رئيسي لينا..
الدوافع الداخلية:
هي الدوافع الموجودة جوانا احنا.. إنت بتذاكر ليه؟ إيه الهدف الموجود جواك وعايز تحققه بالمذاكرة؟
النوع ده من الدوافع مستمر في الزمن ومش بيتأثر بالظروف اللي حوالينا، ببساطة لأنه جوانا احنا..
يعني الولد يكون بيذاكر مش عشان الكورة تجيله.. لكن بيذاكر عشان:
- الإحساس بالإنجاز..
- يصنع مستقبله..
- يشعر إنه عمل اللي عليه عشان تقديره لنفسه يزيد.. لو هي دي الدوافع بتاعته يبقى هيبذل مجهود كبير جدا عن طيب خاطر.. حط لنفسك دافع داخلي وخليه هو اللي يحركك.. إنت عايز تتفوق لأن إنت عايز تتفوق.. مش عشان أي حاجة تانية..
الاحتراق الذهني..
فيه فكرة خاطئة بتتقال عن المتفوقين..
تلاقيهم بيقولوا: ياااه.. ده قعد يذاكر 12 ساعة ورا بعض.. إيه التفوق ده؟!!
اسمحوا لي أقول لكم: ده غير صحيح بالمرة..
لا بد من فترات للراحة الذهنية.. ما تواصلش التركيز لفترات طويلة عشان هتفصل..
نعمل إيه يعني؟
المخ بيشعر بإجهاد زي أي عضو في جسمنا.. لو حسيت بالإجهاد سيب اللي في إيدك.. لمجرد دقائق بس..
في الدقائق دي استرخي وماتفكرش في أي حاجة..
غمض عينيك..
تنفس بعمق وفي بطء..
ماتركزش إلا في تنفسك..
بالطريقة دي إنت عملت استرخاء ذهني تام.. لو عارف في اليوجا أو التأمل يبقى زي الفل.. لو مش دماغك الموضوع ده، يبقى اعمل أي حاجة تافهة تغير بيها تركيزك و تريح بيها ذهنك.. روح اشرب لك عصير أو حاجة وارجع واصل المذاكرة.. (بس ماتعملش فيها ناصح وتسيب المذاكرة وتنزل تلعب كورة مع صحابك وتقول اني قلت لك قال لي لازم ترتاح.. أنا قلت راحة ذهنية لمدة دقائق بس.. فبلاش الحركات القرعة دي يا صديقي!)
ما هي المذاكرة؟
كلنا للأسف بنكره الكلمة دي.. لأننا ربطناها بالحرمان من اللعب والتليفزيون وربطناها بالسهر والإرهاق.. وده غير صحيح بالمرة...
لو ربطنا المذاكرة بالألم هنلاقي إنها شيء غلس ومش عايزين نعمله.. لكن لو غيرنا المفهوم بتاع المذاكرة.. هيتغير موقفنا ناحيتها!!
سؤال:
ما مفهومك للمذاكرة؟
شر لا بد منه؟
شدة وتزول؟
لو كانت دي نظرتك ليها فدي مشكلة..
لأنك ممكن تستمتع بيها أو على الأقل تحتملها، لو غيرت نظرتك دي ليها..
يعني مثلا:
ما مفهومك للمذاكرة
تحدي لقدراتي وطريقة أثبت بيها لنفسي إني أحسن من أي حد..
دي الخطوة اللي فاضلة عشان أحقق المستقبل اللي باحلم بيه..
فكر معايا في الموضوع ده.. نفسك تحقق إيه في الحياة؟
مهما كانت الحاجة دي.. المذاكرة هي طريقك ليها..
فكر في الموضوع كده هتلاقي كلامي صح.. وإنت رايح تذاكر فكر فيها من الناحية دي..
هي دي الخطوة اللي هتحقق لي الحلم اللي نفسي فيه.
الذاكرة البصرية
الذاكرة البصرية بتعتمد أساسا على الصور والأشكال والرسوم.. عشان كده لازم تستخدم الخاصية دي في كل حاجة بتذاكرها على قد ما تقدر..
عشان كده لازم:
1. تذاكر من مصدر واحد بس:
لو عملت كده هتلاقي شكل الصفحة نفسه انطبع في ذهنك بعد فترة ويسهل لك استرجاع المعلومة..
لازم تذاكر من مصدر واحد وتثبت عليه طول الوقت.. لأن عقلك مش بيحفظ المعلومة بس.. ده بيحفظ شكل الصفحة ومكان المعلومة..
2. ارسم..!
دي حركة كنت باعملها وأنا في الثانوية العامة على اعتبار إن ذاكرتي بصرية.. يعني اختراع مسجل رسميا باسمي عدم المؤاخذة..
لما تلاقي فيه نقاط كتير في الموضوع وتلاقي نفسك مش فاكر النقاط دي كلها.. ارسم لكل فكرة رسمة صغيرة تعبر عنها.. الرسمة دي مش لازم تكون جميلة أو رائعة.. مجرد رسمة مرسومة بسرعة لكن تعبر عن الفكرة نفسها.. لما تيجي في الامتحان هتكتشف إن الرسومات الصغيرة دي سهل استرجاعها جدا..
يعني مثلا:
ما إنجازات "محمد علي"؟
من إنجازاته: فتح أبواب مصر على مصراعيها لكل وافد، ولأول مرة يصبح التعليم منهجيا وأنشأ المدارس. وأوجد زراعات جديدة كالقطن واعتنى بالري وبنى المصانع....
رخمة مش كده؟
طيب شوف لو رسمناها كده:
ما إنجازات "محمد علي"؟
فتح أبواب مصر على مصراعيها لكل وافد،
يصبح التعليم منهجيا "
وأنشأ المدارس"
زراعات جديدة كالقطن "
وبنى المصانع"
الرسومات هتخلي الموضوع سهل الحفظ جدا.. ده حتى إنت حفظته دلوقتي وإنت بتقرا الموضوع!
انجازات محمد علي -ببساطة هي:
و ممكن تربط الصور دي بقصة طريفة عشان تفتكرها.. مثلا
لو شايف الأسلوب ده مريح بالنسبة ليك اعمله.. لو مش مستريح له يبقى بلاش تجرب حاجة جديدة قرب الامتحانات..
كلمة أخيرة
اتكلمنا عن أساليب وأفكار ممكن تساعدنا في المذاكرة.. أهم حاجة لازم تعرفها بقى وإنت بتذاكر هي التالي:
1. ماتجربش حاجة جديدة تماما عليك في فترة الامتحانات..
2. جرب الأسلوب اللي ذاكرت بيه قبل كده وادالك النتيجة اللي إنت عايزها.. (ما حالتك الذهنية وقتها؟ كنت بتذاكر فين وازاي؟).
3. الأساليب دي خليها معاك وخليها في بالك للامتحانات الجاية.. جرب الأساليب المختلفة واثبت على الأسلوب اللي يريحك ويدي معاك نتيجة كويسة..
وألف مبروك مقدما على التفوق والنجاح.. وربنا يوفقنا جميعا..
ونتقابل في الأجازة على خير إن شاء الله...
اقرأ أيضا:
10 خطوات لتحسين الذاكرة
كلام سريع عن المذاكرة
اترك المذاكرة و العب